Evans (Mẹfintọ)

Chukwudi Dumee Onuamadike, he yin yinyọnẹn taidi Evans, yin Naijilianu he yin whẹgbledo taidi mẹfintọ dé. Onuamadike yin ovijiji Nnewi tọn to Ayimatẹn Anambra tọn mẹ. E nọ yin yiylọ dọ mẹfintọ adọkunnọ to whedelẹnu na ponọ Naijilia tọn lẹ tindó yise dọ e yin dopo to sẹ́nhẹngbatọ he dó akuẹ hugan to mẹhe to ajọ mẹfinfin tọn lẹ wá to otò Naijilia tọn mẹ. To nuyiwa  etọn delẹ mẹ, e mọ akuẹ he sọ livi dopo dollar tọn. Apadewhé ponọ Naijilia tọn he nọ yin Intelligence Response Team (IRT) sọ dohia dọ Evans bí taun, e tindó ayiha wintinwintin podọ mẹfintọ nuyọnẹnnọ dé wẹ é yin na é kò budó ponọ lẹ manado yin wiwle na owhe ẹnẹ dile yinkọ etọn tlẹ tin to mẹhe yé to dindin nado wle lẹ mẹ to ayimatẹn voovo atọ̀n mẹ Ayimatẹn Awọnlin tọn, Ayimatẹn Edo tọ podo Ayimatẹn Anambra tọn po mẹ). Onuamadike yin wiwle to Awọnlin to azán aotọ Ayidosun, owhe 2017.

Whẹdida etọn

Onuamadike to pipehẹ owhẹ sọha di kande-wiawe he gando mẹhuhu, ajojijẹ, mẹfinfin, awhanfunnú he ma sọgbe hẹ osẹ́n bibẹpli podo owhẹ devo lẹpo. Na taun tọn, e yin whẹsadokọna to whenuena e fin Uche Okereafor to lẹdo Festac tọn to Ayimatẹn Awọnlin tọn mẹ to azan konukundopotọ Abọ̀húsun owhe 2017, bọ sọ biọ akuẹ yi livi awe Dollar tọn. To azan koatọ́ntọ́ Afínplọsun, owhe 2022, whẹdatẹn daho Ayimatẹn Awọnlin tọn dowhẹ Evans po omẹ Awe devo lẹpo gando mẹfinfin po sébibla po dali. To whẹdida lọ whenu, whẹdatọ dohia dọ kakati na Evans ni dó lẹnvọjọ hia, e tẹnpọn nado dó lalo na e nido sọgan gán sọn owhẹ lọ si. Enẹgodo Evans yin sisẹ dó ganpamẹ na gbẹwhenu he po na ẹn lẹ.