Antioku Silia Tọn
Antioku Silia tọn tin to tọ̀sisa Orontes ji, yèdọ nudi kilomẹtlu 30 sọn huto Meditelane tọn he to Seleukia podọ nudi kilomẹtlu 550 do agewaji Jelusalẹm tọn. Séleucus I Nicator, he yin togán tintan Ahọluigba Séleucide tọn wẹ do Antioku ai to owhe 300 B.C.E. Antioku yawu diyin na e yin tatọ́-tònọ ahọluigba enẹ tọn wutu. To owhe 64 B.C.E., Awhàngán Lomu tọn Pompée yí Silia do basi ayimatẹn Lomu tọn de, bọ Antioku lẹzun tatọ́-tònọ etọn. To owhe kanweko tintan C.E., gbọnvona Lomu po Alẹkzandli po, Antioku wẹ yin tòdaho atọ̀ntọ he klo bosọ jẹ adọkun hugan to tòdaho he tin to Ahọluigba Lomu tọn glọ lẹpo mẹ. Antioku yin ahọnkan ajọwiwa tọn po tonudidọ po tọn. Agbàn ajọwatọ he to Silia lẹpo tọn wẹ nọ gbọn finẹ whẹpo do nọ yin didohlan lẹdo ohù Meditelane tọn he pò lẹ mẹ. Ju lẹ sù to Antioku.
